المساعد الشخصي الرقمي

مشاهدة النسخة كاملة : العقل زينة ( نصي )



IL PADRINO
24-09-2009, 17:43
اذاعة صوت الشعب تقدم :
شو بدك العقل زينة
الموسيقا الصامتة الواردة في البرنامج من تلحيم زياد الرحباني
اما الاغاني الغربية فهي غربية و قد تم جمعها في المنطقة الغربية المعزولة عن العالم و المجتمع الدولي
هذه الاغاني من تأليف و تلحين و غناء السود
قتلوني عيون السود اي يا ليل ماله حدود
و قد خرقت جدار الصود فوق العاصمة بيرود
العقل زينة برنامج تقدمه صوت الشعب في مثل هذا الوقت و هذه اللحظات في الذات

حمد الله ما بقى عنا شي
لا بقى في موسيقا نألفها و لا قصيدة ننظمها و لا موقف ناخده و لا بلد من نوع انه يعني تتمسك فيه بدون ما تفطسه
ولاه عمي ما قديه نظمنا بيت شعر اجو مهجرين قعدوا فيه قلنالهم هايدا نظم يا جماعة قال لا هاد مصادر
اخدنا موقف ما بقى سيارة ما اجت صفت فيه ايا فيه صفت عليه والله
و ياريت كلها سيارت مش يالي نزلوا منها
اقتنعنا بانسان صار انسانة مدري شو صارله عمل جراحة يمكن نقص هرمون انا باعرف
ما بتعبق طيب
عبقنا ضلينا على البلكون قشطوا البلكون اجى على الطريق والله ستر ما كان مارق حدا من العباد
يعني بين المزح و الجد كان صار مجزرة جديدة
قمنا نفضنا تيابنا جمعنا هالبالكون على الرصيف و قلنا ما راح نستلسلم بدنا نكفي الطريق
سكروه على راس الشارع ليه قال في تشييع
تشييع عال و مش بس هيك شيلوا كل السيارات الصافة على الملتين و شيلوا البلكون كمان
سالنا اي ساعة بيخلص التشييع لانه بدنا نكفي الطريق نحنا
قال التشييع ما راح يخلص خلص مشي على طول لانه اليوم بده يموت غيره و بوكرا باذن الله كمان راح بده يموت غيره
رجعنا ردينا طلعنا على البيت دقينا ما كانوا يفتحوا المهجرين نسيتهم انا
اخخخخخخخ
حملنا حالنا و قلنا يالله على المطار
طار قبل ما وصلنا فتنا على البريس سألنا المطار الجاي اي ساعة بيطير قالولنا هداك ما بيغط اساسا طاير كل الوقت
منيح هيك
طيب انت محلي انا عم اعرضلك قصتي انت محلي شو بتعمل
هي النا احد عشر سنة منروح و بنجي و بعدنا بنفس المحل
ايه معليش بوكرا بيفجرولك ياه

IL PADRINO
24-09-2009, 17:44
بكل العالم و التاريخ القديم و المعاصر كان في شي اسمه الانصار
انصار الجيش ربما الجيش الحاكم الجيش الثوري انصار البيئة انصار الثورة
يعني انصار من جميعه هدوله بيجهم وقت بيعبروا عن دعمهم و بيستلموا كل واحد بارودة
بارودة بارودة على الماشي
هلئ كل بارودة الها رقم هلئ بس يخلص الجيش او تخلص الثورة او البيئة
بيجوا يا خيي ورا بعض بيوقفوا يالي بقيوا بيوقفوا و بيردوا هي البواريد
شو عاد بدهم فيها شو بدهم على الصيد هي مش بواريد صيد
هون بالعشرة الاف و اربعمية و تنين و خمسين بعد ما حدا رد شي
و ايا عم يخبوا شو حاجتهن فيهم بالله انو الثورة ما خلصت
ما هي مش ثورة
انصار للجيش
مش هيك بيكون الجيش و العالم ناطرة الجيش يا ولد
شو حاجتكم بكل هي البواريد بالله
شو حاجتكم بهي البواريد غير الاشيا يالي ما حدا بحاجة الها
حماية ذاتية
من شو من مين
ما صايرة الحماية من الناس متل حكايتكم ما ردوا بورايد استلموها
من بعد ما خلصت القضية
انت خايف ترد بارودة لانه يالي بوشك بعد ما ردها
ماهيك طيب يا خيي ما هو خايف لانه انت بعد ما رديت
خود بئى تعى ئمني هلئ
ايه يلعن فخامتك بعزى فخامته
كل هالسلاح مش زينة و لا رجال
و لا مراجل شو هو لكان
هايدا خوف قال
ايه هي تسطيلة مش تسطيلة الحشيش تسطيلة

IL PADRINO
24-09-2009, 17:44
كل ما تسألني كيفك بتذكر اني مش منيح
يعني بتعرف لو بلاه هالسؤال و ميل بايدك بس تلتقي فيني
بكون ممنونك يعني لانه صراحة انا مش منيح
بس معقول تقلي كيفك و قلك مش منيح بدك موضوع من غيمة انت
اذا سمعت اني مش منيح بدك تسألني ليه و خود بقى اذا خبرتك ليه
ما بعود بس مش منيح بتصير حالتي تتدهور انا و عم ارويلك
تركني خيي انا بيني و بين حالي ماشي عأساس انه يالله منيح ماشي الحال
ماشي انا و الحال كيف الحال كيفني انا
و اكيد مش منيح بس انا مزبطها مركرجها و ما بفكر فيها
و لا مرة سألت حالي على حالي كيفك منيح
و هي الايام ماشية سيبها بهمها يا اخي و خلينا نسلم بالومى

IL PADRINO
24-09-2009, 17:45
شكرا
هلئ يا اخواتي كل انسان لبناني منا اذا سمع رئيس الجمهورية عم يقول
اي رئيس مش هالرئيس الحالي بالذات
اذا سمع رئيس الجمهورية عم يقول انا مش راح استقيل لانه بصير في فراغ دستوري مش ممكن اترك البلاد ماشية صوب المجهول او شفير الهاوية
اي زلمة بيناتنا باي منطقة من لبنان بيسمع هالتصريح اجمالا بيصدق الجزء الأولاني منه
يعني لحديت ( لانه ) . ( اي انا مش راح استقيل) .
لهون بحسها اللبناني صادقة
حدا بيستقيل ؟
مافي حدا بيستقيل !
بس من عند لانه في بيصير في فراغ دستوري و مش ممكن اترك البلاد صوب المجهول و شفير الهاوية او شفير الوزان او شفير القبطية هايدي كلها هايدي قصص هايدي
مدري ليه نحنا كشعب لبناني هي المواضيع ما بيعود فيها مناطق يعني مدري ليه فردا فردا كلنا بنحس انه هي الجزء هايدا يعني ها ما كتير بيتصدق مدري ليه
يمكن لانه اللبناني انه هو بدئة ملعب مشخشب بكل شي لانه بحاله بيتشخشب بيقسها على حاله
مقطع موصل و اخو شحطة و ما شايف ثقة بحياته قد ما بيحكي عنها و بيستعملها طول النهار
و لو ما عندك ثقة فيني

IL PADRINO
24-09-2009, 17:45
كنت روح اقعد عبنك خشب مضلع او مقطع ما باعرف كيف بيقولوله
يعني خشبة بعدين فراغ بعدين خشبة و مبروم ظهره برم متل كاتشوفال
و لونه اخضر متل لون الحشيش
بنك بجنينة الصنايع
يا الله احلى شي بالعالم جنينة الصنايع
و هالبنك يالله ما الذه على هايدا البنك مقضي ايام عحالها
دوام العادة و كان يرن الساعة 6 للعالم انه بدنا نسكر تفضلوا ضهروا
و تبقى الصناع هونيك مواعدة مع عشاقها لانه بالبيوت عند معلمينهم ممنوع الحب كمان
و اقعد اتفرج على الولاد عم ينططو بالبركة النصانية بنص الجنينة مافيها مي بس اسمها بركة و كلنا مصدقين
و حدي كون و ما احكي مع حدا قاعد على هالبنك
و حس الوقت قصير و الشجر يالي فوق البنوك طويل
ايه عم يخبروني مبارح و تدايقت كتير انه هالبنك هايدا و كل بنوك جوا
افلست
كل البنوك الصغيرة بدها اتفلس بدها تضل بس الكبيرة

IL PADRINO
24-09-2009, 17:45
لتعمل ثورة عن النظام لازم اول شي يكون في نظام
لتعمل ثورة عن النظام لازم تاني شي يكون في نظام
لتعمل ثورة عن النظام لازم تالث شي يكون في نظام
لتعمل ثورة عن النظام لازم اول عأخر يكون في نظام
ولك لتعمل ثورة عن النظام لازم اول عأخر يكون في نظام
اه ههه
حيالله نظام بس نظام شي نظام
اي نظام بال او سيكام بس معروف ربه مثلا انه معين نظام
ليك اذا عملت ثورة عشي مش موجود كيف بتزبط معك
طب مافي نظام كيف عملت ثورة عليه
اي ساعة عملتها وين كنت انا ماشفتك
اول ثورة بدها تصير من اجل النظام و تاني ثورة لتغير النظام

يخليلي عينك الله يرد عنك

انا ما عم جرب غير شي و بسحب كل يالي قلته
انا عم جرب غير البلد يا عيب الشوم شو هالحكي هايدا !
انا ما عم جرب غير البلد و لا عم جرب غير شي
انا عم جرب بس ما خلي هالبلد يغيرني
هيدي واحدها اذا بتزبط معي يعني انتصار انتصار لنفسي اولا
و بعدين عشوا ما بدها على الرجعية و على الامبريالية و على الرأسمالية و على الاقطاعية
و على اول معادي للتطور و التقدم و الحرية و الديمقراطية
هايدي البلاد هي يالي بتغير ما حدا بغيرها
و اذا الجماهير نفدت بريشها تتحسن العيشا

بتصبح احلى عيشة

نفدت بريشها يحرق حريشها تررم
نفدت بريشها يحرق حريشها
نفدت بريشها يحرق حريشها تررم
نفدت بريشها يحرق حريشها

قدمنا لكم دخيل اسمك يا سيدة حريشا

IL PADRINO
24-09-2009, 17:45
لاه ه ه

بتقوم انت ركيض يالله لوين يا با
نازل اشتريها هلئ
هلئ القرار الحاسم و المناسب هي اللحظة هي
لقطة اتوفقنا توفيقة بنت كلب
اشترينا
اشترينا ووفرنا 10 الاف ليرة والله هيك على الواقف
مش هي التوفيقة
انت التوفيقة يا ولدي
ولاه حبيبي طيب ما قشط اخو الشرموش 10 ليرات من اصل قديه
قشط 10 ورقات من دفتر وراق 100 صفحة يا ولدي
قشط بس فايق انه قشط ناسي انه طلع بعمل قبل ما قشط
طالع مية ليرة الدولار و قشط عشر ليرات يعني خلص زهر اللوز و استوت الشمس فوق الاكدنه يحرق حريشك ما اذكاك
ليك يا ولدي وفرت 10 الاف ليرة بس انقرطت بتسعين الف ليرة
اه انت عارف لا
انت نسيت انه الدولار طلع مية و نزل عشرة
نسوك هبلوك سطلوك و استلموك
شو بعد في كلمات بيخلصوا بيلقوك

يالله هيجوا على بعض
و ضجوا على بعض
و احكوا فوق بعض
و عمرو ما حدا يفهم شي

منظرك قدام الصراف
و الذعر المسيطر هلئ هي اللقطة
يحرق دينك شو لقطة
بيأس شي بيأس
شي بيقطع الامل و النسل سوا
بيقطع الامل من احتمال جيل واعي بعدو و لو لحظة بهي الطوشة
شو عم يعملوا فيه
نادى و ما حدا سمع

IL PADRINO
24-09-2009, 17:46
بتقول في البداية ...المهم الصحة ...وبتقول يلا بسيطة ...الله لطف ...حديد بحديد
...بتقول يلا منيح اللي سلم الزلمة وعمرو ما يرجع البيت ...
وفجأ وبعد ما تفك العجقة ...والناس اللي مجموعين بدعا تروح على بيوتها ...والمصلحين والمرشدين يسربون يا رب ..ياكبير ...وبدها تبرد القصة ...مثل ما بتبرد الطبخة ...
وبتبلش وحدك تبلش العيشة ...طيب ما اول شي راح تلاحظو انو الصحة اللي هي اهم شي ...الصحة تمام منيحة ...بس ما بتطعمي خبز وحدها ...زانت اللي بدك تأمناها الخبز ...بدك تطعميها للصحة ...
بتكتشف انو شو يعني حديد بحديد ..
هي كلمة حافظينها اب عن جد ...بلا وعي ..بلا مخ ...
شو يعني حديد بحديد ...يعني كارثة ...يعني حديد فات بالتاني ...راحو الاثنين ...بدك حديد ثالث جديد ...بتكتشف انو لأ...
مش عمرو ما يرجع البيت ...ولازم باسرع وقت يرجع البيت ...
سلم الزلمة وعمرو ما يرجع البيت ..
طيب الزلمة وين بنام ...بما انو سلم ...شو منعمل فيه ...وين بيقعد .. ع قلبكم ؟؟...
مش معقولة ...حساس الزلمة ...ما بدو ...
المختصر ...سلم الزلمة ..ويا ريتو ما سلم ...ع شو سلم ...شو سلم يعمل...الله يلعن كل واحد بيجي بنت وبسميها سلم ...
هات لشوف ...انا ما عم شوف

IL PADRINO
24-09-2009, 17:46
مستمعينا الاعزاء ...اعود لاذكر انو حلقتنا بهذا الوقت ( الترم ) عم يجي عليها اعتراضات كتير لانو الناس عم بروحوا على حالهن نشرة الاخبار ...وطبعا الها كتير مستمعين ....ويعني عم بروحوا على حالهن الاخبار اذا بدهم يسمعونا ...
بس عفوا ...فينا نحكي كلمة ...انو شو هي الاخبار اللي عم بتروحها بالله عليكم ؟؟؟!!
طيب ...ما قولوا هيك من الاول ...بدكن اخبار ...ما نحنا بدنا خبرية بالناقص ...بعدين اذا مصرين بدكن اخبار ...نحنا منقلكم شو في اخبار ...
سلمى ......
نعم
قوليلن شو في اخبار
بالنسبة للاخبار ...الاخبار هي هي ...وبعدنا محلنا ...وفي حرب بكل بقعة بالاراضي اللبنانية ..
بتظبط من ميل وبتنفخت من ميل...زبعدين هاي ما عاد اسما حرب ...هي هيك البلاد بحالتها الطبيعية ...وشو كمان ...وما راح تظبط من هلق لميت سنة ...والطوايف ما بطيقو بعض ...
اساسا اللي قسموا حاسيين حالهن مرتاحين اكتر بلا الطوايف التانية ...
باسثناء كم واحد بحششوا وبيحكوا انو دايق خلقهن بدويلات ..ولازم يقتح لبنان على بعضوا ...يعني وكل واحد من اذاعتو ...بخبر الناس الحرب على طرقتو ...فبيضهروا بيسهروا انو هم اللي ربحوا ...
هي المجمل ..وما بعرف اذا نسينا شي ...
لأ ...
بس بعد في العملات وقصصن ...الدولار والين والاسترليني ...
ايه ...الدولار مقرر يصيف بالباروك السنة ...ووصفولو المناطق العالية ..بسبب مناخا ...ما ناخا وناخنا معها ...
والين يعني ....باليان ...عليان ...مليان ...كيف ما اخذتا مليان ...
والسترليني ...يعني غمريني بحنانك وسترليني بعطفك ...........


كانت هذه الاخبار

IL PADRINO
24-09-2009, 17:46
يا خيي ما بعرف
بيطلع ايام بهي الحي صوت بيانو
بسمعه بيكون بكون ميت بهي الأوضة
صوت بيانو الساعة عشرة عابوكرة
بطقة المجتمع العجق مش معروف من اي بناية من اي طابق
بطل لشوف بركي باعرف منين ما عم اعرف
بصير بطلع ما بيطلع بوشي غير غسيل منشور بكثافة من اجل النظافة
و البيانو ببنايتي و مش عم اعرف اتجاهه
بس لما تدب الحياة بالمجتمع و بالاسعافات صعب يتحدد منين مارقين و اي ميلة
طلع صوت او ضرب او اي منين طلعت روحك
برجع بفوت على الاوضة بس لح اخوت بدي اعرف منين عم يدق
مين عم يدق بيانو
ما بيجي على راسي الا صورة بنت زغيرة و ضعيفة عمرها 9 سنين و نص
قاعدة عم تدرس بيانو يمكن مانها كتير كتير موهوبة بس فظيعة بهي الحي
عم تتعلم على شي منيح يا اخي شي ماله طايفة ماله لغة
ماله تهجاية و لا احرف
مش عم نعرف منين فظيعة بحسها
مع انه عتعصيبته الواحد و هي معلقة على فرد نوطة يعني لانه معلقة معها لانه بعدها عم تتعلم يعني
بوكرا بمشي حالها
انه هي مش احلى البنت من تجمع اللجان و الروابط المعادية للامبرالية و الصهيونية ؟
مش احلى هي البنت من مسودة مشروع اقتراح احتمال امكانية حل لدستور نظام معين يوما ما بلبنان الجديد لأجله و لأجل السامعين مسودة طالعة من راديو صوته متل الصوص بهي الاوضة و مضطر تضل فاتحه
ما بدك ترك شي خبرية انت مسنح و ناطر
تصور بس اذا هي البنت كبرت و ضلت عم تدق بيانو قديش بتصير عظيمة
قديش بتصير احسن من هالحي يالي ساكنين فيه
هايدي اذا سألتها عرفتي شو صار بال 83 ؟
راح بتقلك كيف ؟ عفوا انا ما كنت !
كانت هي انا باعرف انا سمعتها بالحي عنا كانت
بس كانت عم تدرس بيانو !!!!


قدمنا لكم
قدمنا لكم كل ما اؤتينا من جلمود صخر حطه السيف من علي
مكر مفر بيلون بيجنن
العقل زينة

IL PADRINO
24-09-2009, 17:47
Listen to me my friend
We are Lebanese people
يعني ما باعرف شو بدي قلك
We are
نحنا شو شغلتنا
We are business
نحنا Lebanese people شغلتنا ننزع كل موجود و بتطاله ايدنا
ما باعرف اذا فهمت علي
اذا عندك شغلة يا اخي تخربها سلمها او طيلها لل Lebanese people
نحنا شغلتنا ننزعها و بعدين انعن انتبه بنعن بس نخلص منها
شغلتنا و نقعد ننعيها انه يا الله انتزعت شغلتنا كذلك نخرب كل شيئ و بعدين نترسم و نقول
لم يتبقى لنا اي شيئ
شغلتنا على مراحل انتبه :
اول مرحلة الدمار مثلا .. الدمار شغلنا
و تاني مرحلة نظم الرادع عن الدمار
اول مرحلة مثلا الفوضى شغلنا و تاني المرحلة النعي على الفوضى
شغلتنا بالمختصر يا غابة مطلقة نحنا مشجرينها نحنا ساقينها نحنا مربينها
يا ...عيطوا للسوريين
يعني شغلتنا تخريب الامن اولا ... تانيا طلب السوريين ليعملوا الامن
و ثالثا ( على 3 مراحل صارت هلئ ) التذمر من السوريين انه يا خيي تفضل هلئ السوريين يالي بدهم يعملوا الامن هيك
و نحنا عفكرة لشو طالبين الامن ... نحنا طالبين الامن لنطق حنك ...
يعني من بعد ما خربنا البلاد كلها مع شجراتها طالع عبالنا هلئ نطق حنك
و الله بنبسط بطقته ... يعني ... طرق ... طرق ... طرق
طق الحنك متل صوت الدربكه بالنسبة لالنا
يعني شي حميم يمكن ... تراث... لا اكيد بدنا السوريين
او اي امن مرأ على راسنا بهي الحرب
بدنا اخي يعني بدنا بدنا فعلا يعني بدنا ناس يهتموا بالامور يالي نحنا مالنا فاضيين نضيع وقت فيها مثلا
....متل الامن ...مثل الاستقلال ...مثل وحدة البلاد متل الحوار ...
شوهالخبريات هي ...هيدي اشيا ثانوية ....
نحنا مشغولين يعني ...نحنا ما فاضينلها ....نحنا عنا تقييس بناطلونات .......بنطلونات مش زابطة على كروشنا كمان...
ما البنطلون الطلياني ولك خيي يعني ما تزعل مني ...اللي ما بيسع كرشنا ... يعني هايدا دوفو هايدا ...هايدا من ايطاليا جاي ديفوا بيكون ... لانو ليفوت كرشك فيه بده يكون رجليك فيه اطول منك بشي نص متر ...شو هالصناعة المتحضرة .....نحنا مشغوليين يعني ...معقولة يعني هي شغلتنا يعني نضييع وقت بالبناطلين .... نحنا مشغولين بدنا نضهر ...بدنا نسهر ...بدنا نرقص زي ترافولتا اذا قدرنا يعني ... نحنا عنا نشرة اخبار بدنا نقدمها متل ما بقدمها الاميركان يا خيي ...مقتضبة ...مقطعة ....سريعة ...بس بفرق وحيد عنهن انها فاشلة ...وهبيلة ...وريحتها سمنة حموية بدل الزبدة وثوم بدل المايونيز ....
شو لكان ...نحنا فاضيين !!!!!!!! نحنا مشغوليين
نحنا بدنا نخرب الساعات ...والغسالات ...والبرادات ...والتلفزيونات ....هودي الغرب بيخترعن ...شو مالغرب مستعمرنا ....قال شو بيبعتلك كتالوج ....فاضيين نقرأ كتالوج نحنا بعدين it's too late ....هذا الكتالوج ما فينا نقراه لانو صار بالاظان اساسا ... ومع انو الاظان بيشتغل على الناريت نحنا مشينو على الكتالوجات .....وهذا ارقى
...ولو خيي ....مادام شغلنا يعني تصور ...كابس لدرجة انو ما فاضيين نعرف شو السر
شو السبب لحتى هالحالة ما كانت تعرف تجلس من 12 سنة لهاليوم ...مو شغلتنا طيب ....
مهي ايادي خارجية عم تلعب بمصايرنا ...وخلصنا .... نحنا شو دخلنا دول دول كبيرة خيي ... اما نحنا اذا بترجع لقلنا ...
اذا بتحب تاخد راينا ...والله ما معنا خبر شو عم بيصير معنا هيك ...نحنا ابرياء بشرفي ....
وحياة ولادك ...
وهيدا اللي شايفو انت طالع بالعكس على الكورنيش ...مسكين الله يساعدو ....معمي قلبو ...ارهقتو الحرب صدقني ....
وهيدا اللي بنط عن الصف كلو وبيفوت راسو من طاقة الفرن ...بدو خبز.....ما هيدا جوعان ...جاي يأمن خبز لاولادو ...
ما شايف الصف ...ماشايف ....كدر ...حزن عميق ...وهيدا اللي بدو ينجح كمان بدون فحص ...هايدا ما تزعل منو كمان ....هيدا يتيم ...والفحص بدو يحطو بموقف حرج ....حدا بيفحص يتيم ...الله بقولها ؟!...طيب انت ليش ما تشوف انو رغم كل هالنكسات ...بعدنا قادرين نستلم اضخم مخلوق بالبشرية .... منزعبر على الله ولاه
و ما بيعرف ...
هلأ ...اطلع هاي مش فيات ( سيارة ) ركبتلها يا ريس موتور فراري ...طلاع سوقها ...وفلتلا نبريش الريدياتيير لانو ما لو عازة ...ماشية السيارة فرجه بلاه ...بس هم مدري ليش حاطينو يعني ,....بيحطو يعني لانو يمكن تحما السيارة ...بس منين بدها تحمى ...ما راح تحمى ...
انا عندي طريقة ما بخليلك ياها تشوف الحماوة ...هي شغلتنا ... my dear
تخريب للموجود على اساس انو تعديل للموجود ...وتأسيس لتخريب اي شي ممكن يجي بالمستقبل ومحضرينلو تعديل نحنا ...
القانون معدل...الفوتيس معدل ...المية وعشرة معدل ...وعلى هالمعدل ...
واللذة ...انك اذا بتاخد هوياتنا كلياتنا .... ما في واحد مذكور ع هويتو انو هي شغلتو ...
يمكن لانو هاي المصلحة هي بعد ما الها اسم ....هيدي خلقة بتكون هبة من الله ...
نحنا متل التلميذ البهلة و المستذكي ....او الذكي كتير وذكاه اكبر من عمرو وغلطوا وخبرو ...فهبلا ...تلميذ اهم مشاريعه
و انجازاته انو قدر عمل هوووووو و بكل قوة بس لما طلع الناظر من الصف ...وبس رجع الناظر قعد عاقل ومتل التوتو
( يالي اكيد سامعين فيه )
...بس كتييييير مبسوط انو عمل هوووووووو.....وهيدا الحمار يالي هو الناظر ما عرف مين عمل هوووووووووو....
يالطيف شو هالانجاز ....اساسا شو هالمستقبل من بعد ال هوووووووووو...شو رح يصير شو بتعمل والابشع من هيك لو بيعرف هايدا انو الناظر عرف مين عمل هووووو...وآفرو
وما قلو شي ...كل همو انو بس هو رجع وصار بالصف ...ما حدا بقى يعمل هووووو...
ما الناظر مو حاطط عقلو بعقلو ....

فاضيلو يا الله ...!!!!!!!!!
دخيلو .....

IL PADRINO
24-09-2009, 17:47
يا اخي قد ما بتسمع مسرحيات للأخوين رحباني
و خاصة وقت ما كانوا تنين عاصي و منصور الرحباني
و بتكون مهاجر او مبعد او مغترب قال
و قال بتصير تحس بتفكر بدك تطل عأهلك بالصيف
علبنان الحلو بيتهيألك بس وئت ما بتوصل راح تشوف اخضر اكيد
و يمكن تحتاج لحكيم عيون ئد مو كلشي عم تشوفه اخضر
و راح تشوف الشيم على الوصلة و عالي الشمايل راح يخلصلك غراضك بالمطار نفسه
و راح تشوف واحدة تئلها هلي عالريح يا عيني
و لا تخاف السالم غفيان مش بردان ايو ايه مديق سالم اي و الله
و بدنا نكفي بيالي بيقيو مش بدنا نكفي على يالي بقيوا
و طبعا و الشعب العنيد هايدا الشعب العنيد حتلتقي فيه على الوصلة
و عنيد حتلاقيه عنيد اه بس مش عنيد على الفاضي
عنيد عالشي تيسنة يعني اكتر من العنيد
هايدا تيس هايدا ماسك طائفية و عنيد خود بقى تعى ائيمني
اي لا
بس توصل من المهجر شي بتوصل على المطار
راح تتطلع اكيد فخر الدين مش مبين بقاعة الوصول يعني
و الجبال يالي ما بتنطال كلها مقصوفة و ايا ملقوطة من كل مرابض المدفعية من وين ما كنت
و عفكرة ضمن الاراضي من وين ما بدك فيك تقصف وين ما بدك قد مو طويلة البد و ضخم
يا اخي المشعل باميركا و الحرية عنا
نحنا مأجرين المشعل للامريكان حدا معه عند ربنا ؟
بس تاركين الحرية هون
انه مين فكرك راح يستقبلك على المطار تسلم لي
الملكة بيترا يعني
و لا زنوبيا شخصيا ؟
مين فكرك انت يالي حي زقلك الشنط
فاتك المتصلب ... لا
يا اخي الصرافة صرافة و التدفيش تدفيش
و الشنط الله بيعرف شو في بالشنط اساسا
مين بدك يعني مين راح يعبلك الورقة لتضهر
هالة و الملك
هودي مغتربين بالبرازيل هالة و الملك
و كمان اخر مافي غير المطار العظيم يالي بيلخص البلاد
بدهم يفتحوا فوقه انشالله بس ما يفتح مطار حالات
احلى ما نكون انتقلنا من حالة واحدة لاكتر من حالة ... لعدة حالات
لعدة حالات و كلها من نفس الطينة
و العقل اساسا طينة
و هالخلقة راح تبقى فينة
و الطينة العامة يالي راكبة
اي و الله زينة
ايا زينة هه

IL PADRINO
24-09-2009, 17:48
ليك اذا قررت واحد ما تسمعله
و ما تقلوا سكوت ما تحكي
لا
افضل تقله احكي خيي
و انت بهي الوقت ما تسمعله
و هو شو حيعرفه اذا بتسمعله
وحياتك فظيعة جربها
مين بدك احسن الناس بيعملوا هيك
مين ؟
الاميركان مثلا
في احسن و ارقى من الاميركان ؟
ايه هايدا السيستيم الرئيسي تبعهم
كلها بلاد ماشية على المنوال
طلاع خيي مين بدك استأجر ساعتين على احسن محطة تلفزيون مين هي استأجرها
بيأجروك ياها و طلاع عمدى ساعة كاملة قدام المواطنين احكي عن ريغن
سبه بالعرض و بالطول .. سب حريمه .. نشر يالي عمله.. نشر الله يالي خلقه
لتسكر القناة ولك خيي منيح هيك
و انت كل يالي بقلبك قول و كل العالم بتسمع شو قلت
بس مين قالك انه سمعت ؟
و بعدين اذا سمعت و بعدين يعني و سمعوا ايه ؟
و عرفوا و ريغن سمع و تفرج و تسلى
بس مين قالك شو عرفك انه اذا واحد اذا اذنيه بمخه يعني عم يسمع
ما كل الاذنين بيجوا بالمخ
هيك احسن شي هيك
هيك الاميركان اكتشفوا انه هايدا احسن انطباع فيك تعطيه عن الحرية انها حرية ..
الحرية المزبوطة يعني انه سامعين فيها فكرك تجربت بشي محل يعني ؟
غير هون تجربت شي بمحل ؟
مين قال انه ضروري لازم يكون في حرية ولك خيي
هلئ في بغال سارحة بتعطيها حرية ؟
ولاه البغل بخبط خبطة بالمجتمع بيجبه بمجتمع تاني
هلئ تجربت عنا الحرية خود خود نتيجة
خود امثال
انا مثلا
فائستني بروح قاتلك !
و بسرب
ما بسرب على الحبس بسرب على البيت
بسرب على البيت و عازم عالم
هي الحرية
هي الحرية تجربت هون فقط لا غير يعني
هيك الاميركان وصلوا لنتيجة انه نسبة حرية معقولة كتير كتيركتير منيح
انك تطلع تسب رئيس الجمهورية ... تطلع ترسمه عسطل زبالة ..
فش خلقك روح ... بس مافيك تعمل شي
غير هيك ... هي الحرية
و هيك بيشعروك الاميركان انه ليك السوفيت !
ليك القمع ... ليك كيف ما في واحد بيعبر عن رأيه
مافي واحد بيقدر يقول شو عم يفكر
انا باعتقد مش بهي السخافة هالقصة
هديك دولة كمان و كبيرة
و مو عارفة يعني انه عم يحكي عنها الناس و انه عم تمنع الناس يحكوا مش بهي البساطة هالقصة

باعتقد السوفيت عارفة انو العالم كله طانن الدنيا
بالحرية يالي مش موجودة قال
طيب انا باعتقد انه السوفيت كمان قالوا للناس بالمقابل
يا خيي تعوا لنقلكم المزبوط
من هلئ لعشرين سنة بعدا الثورة يالي كلفتكم عشرين او اربعين سنة
سمعوا منا و اقتنعوا بهيك خليكم هيك هلئ
بعدين خيي بتشرعوا و بتناقشوا و بتعبروا عن رايكم و عن الحرية
هي هي الحرية منيح
عبروا بوقت تلاقوا حدا يرد
عبروا بوقت اذا حكيتوا يتغير شي
باعتقد ما بدهم الناس يحكوا ولك خيي و ما حدا يسمعهم
و يفكروا حالهم عملوا شي و عبرو و فكروا و سبوا و نشرو حريم
و عارفين حالهم من هلئ لعشرين سنة ما فيهم يسمعوهم
في اشتراكية عم تنبنى ما حدا يفتح تمه
في مية مليون فلاح بليلة صاروا ملاك
هايدي ما بتحملها عشرين سنة سكوت مثلا
و بلا اراء و بلا حرية رأي هيك خففولنا ياها هي الفترة


انا مع الحرية
حرية شو هايدي هه
شو هي الحرية ؟
حدا مفكر شي مرة
انا مع الفلاحيين ولك خيي
مية مليون فلاح صاروا ملاكة
يعني لو كل العالم صارت ملاكة
يعني ما عاد في ملاكة
ليك ما الذها ههههه
و بلا هيك حرية مايعة يعني خاصة من هي الحرية يالي بيفبركوا منها يعني
هايدا يالي مستلميكم فيها
هايدي حرية الملاكة
احسن شي هيك
اسسوا لتصيروا ملاكة

IL PADRINO
24-09-2009, 17:50
اه ..
شو ..
شو بدك وله ..
يا اخي العقل زينة
تهانينا تعازينا اذا فيك تزينا العقل زينة قد ما فينا
عباس شاهينا - ابو عبسة – الرحباني - سلمى مصفي– كارمن لبس – رولا


توقع بالمشكل اوقات انو بدك تنقي بين انسان كتير كتير نظيف بس طائفي و للعظم
و بين واحد علماني للعظم بس حربوق ملعب ذكي لدرجة العمالة
و التاني بيشتغل بالاولاني بيبعته على الموت بيرده على الحياة
بيستعمله حطبة بالصوبيا لأخره
المشكلة انه فيك تعمل وطن انت و التاني اذا ما كان هالقد كذاب و حربوق و ملعب
و الوطن الافضل بتعمله انت و الاولاني اذا بيقدر يعمله طريقه ما يكون هالقد طائفي
اخ لو بيزبط الاولاني ....

IL PADRINO
24-09-2009, 17:50
اوائل الحرب
ايام عين الرمانة الشياح – الشياح عين الرمانة
صار محاولة اقتحام من عين الرمانة باتجاه الشياح و نجحت
فاتوا على معمل بيقولوله معمل الريتشاوي
سرقوا شي عشرة الاف صباط
و انسحبوا .. غطوهم بالنار .. و انسحبوا
و قعدو فردو لشوف شو طلع معهم
طلعوا كل الصبابيط فردات شمال عشرة الاف فردة شمال
و ياريت يعني ... وين بقيوا اليمين .. بالشياح
فقام استحسن ببال الاحزاب الوطنية اتصادر كل فردات اليمين
مصادرة مش سرقة ... ما بيعملوها
و كيف بيمشي البلد يا اخي
فردة هون ... فردة هونيك
يمكن كانوا عارفين
ان كانوا هوديك و لا هود انه حينشل عالم
بعدين يعني عارفين هنن حيشلو عالم باذن الله يعني
بقى فردات يمين بتنفع ليالي مشلول باليسار
و فردات شمال بتنفع ليالي مشلول باليمين يعني
بقي هلئ بالاستراتجية البعيدة بتاع الجماعتين
ينسرق عكيزات و هايدا ما بده شي يعني
لا بدها اقتحام و لا بدها تقعد تفرد و تعد
بتزبط على اليمين و بتزبط على الشمال

IL PADRINO
24-09-2009, 17:50
صحيح انت استشهدت و خسرناك
لانه ما عاد فينا نشوفك بعد اليوم
صحيح يمكن متل ما عم يقولوا كتار انه رحت رخيص
بس لا
شو بدك
انت اساسا ما عرفت شو عادوا عملولك من بعد ما متت حقيقة يعني
هلئ شو بدك ..
خدني انا من برا عم احكي
الحقيقة يعني عملوا كيف بدي قلك عملوا شي بعد ما نعمل هيك
هلئ حقيقية ليش ليجي الواحد ما تواخذني يجقجق انه يا با راح على الفاضي
و منشان شو استشهد و هال الاشياء هايدي .. لا
مش هيك القصة ..
انت استشهدت من هون و الله العظيم استنفرت كل الاقسام بكل المناطق
ما عاد استرجى حدا من العباد مد راسه اساسا من الشباك
و جو رعب ... و صمت ... و وجوم
هايدا الوجوم يعني اقوى من الصمت
هايدا صمت بس 3 نجوم
و خود بقى لحق كيف ما فتلت بكل وسائل العالم تبعهم 3 اذاعات
نعت ... يعني نعت .. مين عم ينعو .. بعدوا كله لالك
بعدين نكسوا اعلام الحزب .. كلها كلها اعتبر
يعني انا عملت فتلة صغيرة كله منكس
و انطلقوا من حد المركز الرئيسي مسيرة شي فظيع
ووصلوا فيك لقدام الكنيسة و ساعتها شوف الوجوه
هادا يالي بيقولوله التاثر البالغ ..سامع عنه انا بس ما عرفت شو هو لحتى شفته
تأثر بالغ السن القانوني
ايا تأثر كيف بيقولوله يعني
يعني مفجوعين انت الصادق
وقفلوك صفين عسكرية على الميلتين .... و عسكرية مش حيا الله يعني ..
ووصلوا بقى رؤسا الاقاليم .. رئيس الشرطة العسكرية .. و المجلس .. و النجدة
وحدات الاشارة .. شو بيعرفني كلهم كلهم كانوا موجودين ...
و لحق بقى على كشافة اسراب كشافة لا عارفة و لا شايفة ليه عم تنشد ما عارفة
بس عم تنشد و المدرب تبعهم ضرب ولد كف كان قتله لانه شافه ساند على شجرة قال ما عم يمشي
كل الاولاد عم يغنولك يعني ... ما منيح ؟
و اجى وفد من المخاتير .. المخاتير بعدهم طيبين تصور و انت استشهدت
قليلة هي ... لا مش قليلة ... عظيمة
و الخوري عم يأبنك بالداخل و رئيسك برا ... رئيسك اجى شخصي .. تصور
وواقف بهي الصقعة اي والله ... واقف و يخطب ما خلى كلمة فيها بتبكي الا ما قالها .. ما منيح
و فجأة طلع ضرب انئزنا يعني ..لفتنا تاري بلش المدفع 21 طلقة
يوه وين صاروا 31 طلقة
شي بلش مدفع تاني من حده
شو هالدبابات يعني كلهم
طيب يزتوهم عالضاحية فرد مرة
اساسا هو كرمالك الضرب بس ما حنقلك انو كله كرمالك
منه كرمالك و منه على اعدائك
ما هنن حلفوا ... بخطاب .. رئيسك قال راح نمشي على دربك ...
راح نضل اوفياء للوعد و اعدائه و اعدائك
بلشو بالدفن ينتقمولك
صار وقف اطلاق ناري
و طلعلك زغلول الدبور
طلع طلعية انا بعد قديه انا سامع للزغلول بعد ما قايل متلها بحياته
الله اكبر
و الشباب طبعا موزعة السطوح حتى ما يصير اي شي يعكر هي الدفن
هيك لازم يكون الدفن
بشرفي يا ريت تكون موجود بدفنك لتشوف لانه الحكي مو متل الشوفة
هايدا دفن من الاول هيك
شو بدك انت ... موت ! ... موت بس .. و خود نتيجة

IL PADRINO
24-09-2009, 17:51
ما في شي بيتسجل بالتاريخ اسمه كنت ربحت
مع انه كنت... بتعطي عماضي و التاريخ كمان بتحسه بيعني الماضي
بس ما مستعد التاريخ يسجل كنت ربحت
بالتاريخ في ربحت او ما ربحت
اي خسرت
اما كنت ربحت او عشوي كنت ربحت
قشطت حدي كنت رحت
يعني لو بوصل قبل بتكة كنت متت
هايدا كله طق حنك
انتبهت
هايدي كنت ربحت ... كنت متت .. هايدي بتحكيها انت شخصي لاصحابك
و صدقني بينسوها كمان
فما بقى تعبت شي من هالنوع لينشرلك ياه التاريخ
التاريخ مش جريدة لبنانية و لا اذاعة عربية ... فهمت
التاريخ سيخ .. خليك يا خيي باخبارك باطار اصحابك
و عفكرة يقبر صحابك

IL PADRINO
24-09-2009, 17:51
في اشيا غريبة يا شيخ
انت ليك مثلا شعر المرأة قديش حلو
شعر مرأة يا خيي مو حلو ..
اوف شو حلو
و ليك مثلا نفس الوقت شعرة واحدة ما اقرفها
وين ما لقيتها يعني شو بدك بصحن شوربة ماجي لنقول
فرضا هلئ ما حدا يبلش يتقرف ..لا .. بتصير
صحن شوربة ماجي
او مثلا على مرد تخت ابيض
او شعرة لافة على رمش ولد قد ما بتحبه و بتبوسه امه
شعرة طالعة علقانة بكستك الساعة مثلا كستك حديد تعى سحبها كلها و شيلها بئى
و عتئطيش ... بالعجين يا خيي .. هينة بالعجينة شعرة طالعة تعى شيل الشعرة من العجينة
او شعرة مثلا جايي مختومة مع علكة .... و علوك ... و سحب و علوك
ما باعرف ... بس رجاع تذكر اذا قرفت ارجاع تذكر شعر مرأة كله مع بعض
و حلل و ناقش ... طبعا الاجوبة بناخدها بالحلقات القادمة ... بعدة حلقات
هلئ غير شي كان ... اه اذا بعدكم معنا نحكي غير شي
افترض ... ما باعرف اذا سامعين بالكمنجات
الة الكمنجة .... كمنجات ....
ليك مجموعة من الكمنجات عم يدقوا ما احلاهم
ما معقول يعني متل السما ....
صوت الة بشرية متل السما ... متل الفلا .... لا حول و لا
و ليك بنفس الوقت صوت كمنجة واحدة ما باعرف اذا حدا متوفق بجار..
عنده بالبناية ... بالبناية المجاورة ... لانه بتنسمع يعني
اذا حدا متوفق بجار عم يبلش من جديد دروس على الكمنجة و عم يتمرن .. كمنجة واحدة
مو معقول ... ما بتقول يعني ... ضرب هالكمنجات .. يعني .. ههههه ... شو بيعرفني
التشبيه في محله .... بس متل واحد عم يفرم كومودينا ...
يعني جايب منشار كهربا ليقص فيه خبز و راح يجربه بالكومودينا
برضه حلل و ناقش

IL PADRINO
24-09-2009, 17:51
ازعاجين من اهم ازعاجات العالم السبعة
الاول : انك تتوفق عبوكرة الصبح بسيارة مرسيدس عمومي ماشية قدامك و ما معها ركاب
الثاني : انك تتوفق بسيارة مرسيدس عمومي غير هديك ماشية وراك و محشاية ركاب
هودي هنن الازعاجين طبعا من هلئ من هل الازعاجين بيطلع ازعاج ثالث هلئ انتبهت انا
ازعج من التنين و يالي هو انك تعلق بين التنين القداماني فاضي و الوراني معبى
هه عبولك نهارك
القداماني بيعملك بايده هيك و الوراني بيزمرلك

IL PADRINO
24-09-2009, 17:51
ما تتوقعو جميعكم يعني المناح و العاطلين انوا اذا انا شيوعي مثلا
ما يحلالي مارس هي الاخلاق الشيوعية الا مع الرأسمالية
اي لأ ... بالعكس الشغلة
انا انساني مع الانسانيين و رأسمالي مع الرأسماليين
لانه هنن طبعا بيتمنوا هنن انه كل العالم يكونوا شيوعيين الا هنن
ليه .... ليستغلوهم
لانه الشيوعي مثلا ما بيفكر يستغل زميله لا هنن اخدينا عنن
منشان هيك يا عزيزي انا بتصرف اقطاعي مع الرأسماليين
و امبراطوري مع الأقطاعيين
يعني الأقطاعي اذا هنن بيعيطلوا ... سيدنا
انا شغلتي خليه يعطلي .. مولانا
و باعرف انه بيعملها .. و بدون عنف حتى .... لانه بده ياني .... بده تعبي
و كونه واطي بيعملها و ضميره مرتاح
بيعطلي مولانا و انا يالي عم اشتغل
ليك ما تخلي حدا يستغلك ... لا بل اذا فيك تستغله للراسمالي من هلئ لحين ما يزول ما تقصر
بس بأخلاقك انت مش بأخلاقه هو
و بدون ما تصير رأسمالي برأسمال صغير شي 2000 ورقة يعني
و استغل يالي لفوق مش يالي تحت ما تلخبط ... لانه اوقات كتير انت بتلخبط
الشيوعية مش ضد الله ابدا ... ضد انه يكون الله و جنته للفقرا بس
و انه شو بدكم انتوا بتعاسة الارض انتو الجنة ناطرتكم فعيشوا بهي النعمة
النعمة يالي جاي بالجنة ... و النعمة يالي هلئ شايفينها ارخولنا ياها معليش
ارخولنا ياها لانه نحنا راحين على جهنم على النار بعدين ... هاويين جهنم نحنا
و حظكم احسن من حظنا لأنه رايحن على الجنة .... يا الله .... شو هي النكتة
ليك اذا في الله ... و انا مش عارف انه في .. و ماني مؤمن فيه ...
و اذا موجود بؤمن فيه ... و اذا موجود بده يكون عقله كبير و ما بيهمه شو رأيي فيه
و ما راح يتاثر الله لانه كبير .... ما راح يتأثر بانسان صغير عم يشكك فيه
و اذا موجود بيكون عم يسمعنا .... و عم يسمع العقل زينة كمان
و بيعرف مين الأوادم و مين اخوات الدينة
و عم يعمل حساباته للجنة و النار هو بيقسم مش هنن

IL PADRINO
24-09-2009, 17:52
شو هي الغبرة يا شيخ مو معقولة الغبرة شو هالغبرة هايدي
مش هالغبرة هايدي بالذات
الغبرة عامة يعني
تفكر حالك نفدت من الغبرة بالشتا
قال بينقى الطقس و الهوا نظيف و بعدين حكما بتسكر اكتر من الصيف بسبب الصقعة
و بترتاح من الغبرا ... انا سمعت نسوان عامة هيك بيحكوا
بس شو استفدنا اذا سكرنا بالشتا و ارتحنا من غبرة الصيف ما كل شي عم نعوزوا بالشتى
و احنا مسكرين بنتج غبرا ... هاد عد معي
بطانيات – كلسات صوف - حرامات – مردات – كنزات – مشالح
وليك يعني اذا في منقل فحم بالبيت اكتملت يعني
طيب بالصيف مافي كنزات و لا حرامات
بس بدك تفتح احلى ما تفطس ... شوب
فبتجيك الغبرا .. بتجيك الست هيك من بيت غبرا و نهايته انه شو حلتها هايدي
يمكن اقرب شي للغبرا الرجعية ... و مش هيك خبط لزق كلها ...
الرجعية من فئة البرجوازية يالي بيقولولها صغيرة
يعني بكلمتين مش البرجوازية العريقة يالي ابا عن جد مثلا
هي البرجوازية الصغيرة يالي مثلا فجأة اغتنت ..
او بتغتني بجمعة ...بتطبش بالجمعة يالي وراها
و عأمل دائم انها تصير برجوازية العادة يعني كبيرة
هي مو معروف وين الله حطها
و ما بتمشي مع حدا هايدي .. لا بتمشي مع العمال .. و لا بتمشي مع البرجوازية
كرهانة هول و محسودة من هوديلك
الغبرا متل هي البرجوازية هي ..
هايدا البرجوازية صغيرة بنظامها البرجوازي موجودة
اما هي دولتها بتعتبرها يعني ...متطمئن يعني
دولتها بالصيف كلها غبرا ... كلن عم يجربوا يصيروا غبرا ...
هلئ اذا الدولة اشتراكية مفروض ما بقى في منهم دول
صرنا بالشتا هلئ
اي بتضل تلاقي منهم ولك خيي
بيضل بيتطلعلك ناس مستعدين انه سلمن منصب واحد بس لو طوله 30 سم
اي بيتحولوا لأقطاعية ايا برجوازية
يبقى شعب قبلهم بامه و ابوه مشي
راح بحياته باولاده بارجليه لوصل هي الثورة بسلامة
و صارت هي بالحكم
اي بيجيك واحد بسلحب .. متل الغبرا ... متل الغبرا انت مسكر بالشتا
متل الغبرا و انت فاتح بالصيف
بينزع كل شي ... بحرف الطريق كله ... الطريق يالي الناس مشيوه على رجليهم من قبل
هيك برجوازي صغير مهضوم اهم طموح عنده ... انا
و انا كتير صغيرة ليقدر يخبيها و كتير كبيرة لتاكل كل الباقيين
هلئ بشرفكم ما بتشبه مواصفاته مواصفات الغبرة
فوت على اوضة ما بتقشع فيها الغبرا
اقعود بالاوضة بتلاقيها كلها غبرا
ما باعرف لازم العلم بهي العشر سنين الجايين
قبل ما يوصل على كوكب الزهرة ليشوف شو فيه عليه مين فيه فوق
اكيد بده يطلع فيه غبرا
لازم العلم يفكرله بشي مسحوق لآزالة الغبرا قبل ما تطلع
و مستعدين نعمله حملة دعاية ببلاش و الله

و الله انا باعرف ناس مش قصة انك تاخد من دربهم يعني او تصدرلهم املاك لتعمل اشتراكية
ناس هلئ بالنظام الحالي فيك تجربهم قبل ما تصير اشتراكية
بتعملن test يعني
ناس من نوع تصور ... اذا حدا غيرن ناس قدر اشترى او حوي بطريقة ما يعني
اذا قدر هيك توفق ببنطلون هنن عندهن منه
بيشلحوه و بيقعدوا يفتشوا على شي اغلى
مرتاحين فيه و غيرهم بيرتاح فيه و شلحوه و قاعدين يفتشواعلى شي اغلى
ليه ....
لانه صار صعبة .. جلجقة هلئ .. مو معقولة ... كل العالم لابسة منه
شو هادا ... ايه هاد وين بدك تخلص منه
هادا لو صار في اشتراكية مافيك تخلص منه
هودي اذا ... فرضا فرضا فرضا .. اذا ما عاد التقى شي اغلى منه لهالبنطلون شو بدن يعملوا
اذا هادا ما بقى في اغلى منه كل العالم قادرة تحصل عليه شو بدهم يعملوا
هولي هنن الغبرا
ما باعرف اذا كنت واضح بحديثي
و صيف و شتي و غبرا

IL PADRINO
24-09-2009, 17:52
قد ما تخترعوه كلمات للتعبير عن قوة صاروخ الغراد
بيضلوه صاروخ الغراد اقوى
قد ما تسلتوا افتتاحيات بالجرايد و موسيقا و شعر عبوكرة الصبح بالاذاعة عن هول الفاجعة
هول الفاجعة اكبر
و قد ما تخترعوا كلمات للتعبير عن قوة الموت
بعدا اقوى و احلى و اصدق كلمة الله يرحمه

IL PADRINO
24-09-2009, 17:53
ليك
ليك هلئ انت و صغير ما علموك بالدروس الاشياء ؟
ايا اشياء ؟
اشياء كتير يعني ما بقدر قلك عنها
ما دامك هيك ههههه



بعلمك بيكون الواحد ناطور البناية
بيصفي فجأة ناطور عليك شخصيا
و ياريت ناطور منشانك
ناطور على اخبارك يالي انت كتير حريص على انك تبعدها عن كل النواطير


مشي طق الحنك ...
المهم يالي بيدينك مصاري ما يكون بيته على طريق بيتك و لا يكون بيته على طريق المطار
لالالالالالالا ....


خبرك شغلة ...
لا
طيب ...
باي
لا
لا

IL PADRINO
24-09-2009, 17:53
عفكرة الانسان هو اكتر واحد بيقدر يشم ريحته
في واحد بس بيقدر يشمله ريحته اكتر منه
يالي بيكرهه

IL PADRINO
24-09-2009, 17:54
تعرفت على واحد مخه بيسكر نهار الاحد و ايام الاعياد متل المحلات تماما
اخر فترة صار عم يسكر مخه بالاضرابات كمان
و يعني اذا في ذكرى انطلاقة او ذكرى انتفاضة او ذكرى اغتيال حدا معروف
كمان عم امرء عم لاقي مخه مسكر
باعتقد لزم مخه لحدا ... بافتكر صار ادارة حرة ... قولك لشو حتى ينمه
عطاه لحدا غيره محمس بركي بيستثمره .... حرام

IL PADRINO
24-09-2009, 17:54
عم يحصل معي شي مش طبيعي
عم يحصل معي انه باحضر فيلم درامة لميشيل تابت و فيليب عقيقي ... ايه بيفطسني ضحك
بقوم بحضر فيلم لوسيم طبارة و سامي خياط بيبكيني
ليه عم يصير معي هيك
مع انه استفسرت
قالولي الجيران انه بالقلب لازم يكون
المفروض انه وسيم طباره بيفطس من الضحك
غريب ...
لازم لاقيلها حلة هايدي
كفي ... كفي
و الله انا ميشيل تابت بيضحكني مش وسيم طبارة
و انا كمان
احلى شي فيليب عقيقي بس يبكي ههههههههه
انا بموت من الضحك ههههههههههههههه

IL PADRINO
24-09-2009, 17:54
قداحة عيارها قوي لدرجة انه ما بتضوي
او بالاحرى ما عاد تشوف ضوها قد ما قوي
ما فوق البنفسيجة بتصير
يعني كانها مش عم تشعل
و انت الشعلة
انت الشعلة تبع الذكى
انت ذكي لدرجة انه حديثك مش مفهوم
متل حديث البهلة
سوري

IL PADRINO
24-09-2009, 17:54
كيف بدك تلاقي الشنكاش اذا كل يالي تعرفتلي عليهم عم يضيعوه يا ماما
هلئ ها وينه الشنكاش ... لاقيلي ياه
قلتلك مية مرة يا ماما الشنكاش ما تسطعو
العبوا قد ما بدكم من عند التلفون لحد البراد و الشنكاش اتركولي ياه اذا بتريدوا
فهمت !

IL PADRINO
24-09-2009, 17:54
بتعرف يا عيسى
شو ماما
عيشة مش بروح لنام
ايه
ليلية كل ما جرب انبسط بنومتي بغفى
لا

IL PADRINO
24-09-2009, 17:54
يالي فزعان عنده استعداد يبورد بشهر اب اللهاب
حتى بدون اي سي بدون ايركوندشينين و لا مراوح
و محلك بوظ و راوح
دخيلييييييييو

IL PADRINO
24-09-2009, 17:55
قال فلاديمير ايلتش اوليانوف الملقب بحسب اسم نهر روسي سابقا معروف
الملقب ب لينيين
قال لينيين الوحيد يالي ما بيغلط و لا مرة اي ابدا
هو الانسان يالي ما بيعمل شي
مبين بسيطة الجملة ايه معليش
هالحقيقة و كل حقيقة كتير دايما بسيطة
انت معصوم لحد هلئ عن كل انواع الغلط
بس لسبب واحد
لسبب انك مقبور مش عم تعمل شي تقبرني
و تبيعا مضطر قلك الحقيقة و يالي هي كتير بسيطة
انا خيي الحق علي و بكل شي
لانه بيناتكم انا الوحيد يالي عم اعمل كل شي
و انتوا مش عم تعملوا شي
و اذا بتعملوا شي بتعملوه غلط
يعني مع انه لينيين مش قايل يالي بيعمل شي بيغلط
يعني كل عمل بغلطة ..
انتوا سابقين بأفعالكم لينيين بفكره
هو كان قصده يالي عميعمل شي بشكل دائم مش ممكن الا يغلط لأنه بشري هو
بس انتوا قصدكم ما تعملوا شي الا غلط
فبتمنى عليكم ارجوكم يعني خليكم ما عم تغلطوا
يعني ما عم تعملوا شي
لانه كل عم تعملوه
غلط

IL PADRINO
24-09-2009, 17:55
فكرتوا واقفلي بسيارته ليمرقني
اول مرة بتصير معي
قلت مش معقول
شو لطيف هالانسان
يعني لو منه كان ممكن ضل مادة ايدي طول النهار لأطلع من هالصفة و تعتم و بعدي ما ضهرت
مش معقول ما بتخلى الدنيا من هيك ناس
ابتسمتله لاشكره و ضلعت من المحل
ركبت دوزييم و فليت
دغري شك محلي
طلع بده يصف محلي
هايدا كان عم يصلي لفل

IL PADRINO
24-09-2009, 17:55
- ياه هودي ليكي يا سلمى هولي مش ممكن يكونوا مع العدالة الاجتماعية افهمي
لانها بتنضر كتير مع مصالحهم
- مش مزبوط بس انت اسماع اذاعتهم ليه ما بتسمع اذاعتهم
- هو عم اسمع اذاعتهم مين قالك اني ما عم اسمعها
- اي لو عم تسمع اذاعتهم مزبوط دايما هنن بيحكوا بيطالبوا بالعدالة انه الاجتماعية و المساواة و تكافئ الفرص و هيك
- ايه
- كتير هنن مع هي الاشياء مش متل ما انت بتضل تعبيلي راسي عنهم
- طيب متل ما بدك
- شو يعني هلئ ما عم نحكي انت ما قلتلي بدك تناقش
- اي ناقش ايه مبلى
- اي شو
- هايدا مش نقاش
- ليش كيف بيكون النقاش انه اذا ما وافقت معك على رايك لازم وافق معك على رايك
- انت هلئ شو ما بتسمعي بتصدقي بركي هولي الجماعة باذاعتهم عم يكذبوا مثلا مو ورادة
- و ليش مش جماعتك تبع هولي اليسارية عم يكونوا عم يكذبوا .. ما بيكذبوا ؟
- اوف هنن يالي بيكذبوا
- اي ها شفت
- اه منيح هيك انبسطتي
- اي لا انه كل العالم بتكذب
- عفوا يا جماعة بس كل العالم بتحكي نفس الحكي و الاخلاق بالحكي هي ذاتها المهم الممارسة
- الممارسة يسلملي ربك
- و بعدين الحكي ما عليه جمرك يا سلمى عفوا يعني
- كيف يعني شو دخل الجمرك
- تفضل بدها تناقش و مش سامعة بالجمرك
- سامعة بالجمرك مين قالك بس شو دخل الحكي و الجمرك
- لا الحكيما عليه جمرك يعني فيكي تحكي شو ما بدك فيكي تفشطي و فيكي تغلطي و فيكي تقولي الحقيقة فيكي تقولي انك مع العدالة الاجتماعية و تكوني انتي المسببة عدم العدالة الاجتماعية يا سلمى و فيكي تقتلي عالم و انتي تنعيهم و انتي تمشي بدفنهم فهمتي شو معناه الحكي ما عليه جمرك
- اي و لشو النرفزة ؟
- لشو النرفزة بسببك و بسبب مخك مصدقة يعني انه هولي الحزب و الجماعة مع العدالة الاجتماعية هيك يعني هنن قالو و بيقولوا و هالمخ لشو ناتعتيه
- كل واحد حر برايه و بعدين حاجة تزفر بالحكي و حتى لو كان الحكي بلا جمرك
- ايه بامرك
- يا جماعة بلا تشنج خلي النقاش
- لا يعني بحياة ربك يعني قديش حلوة شي حزب يكون ضد العدالة الاجتماعية هيك يطلع واحد من المكتب السياسي بيقول نحن ضد العدالة الاجتماعية معقول هاي
- لا طبعا لا
- لا ما هي سلمى الا ما يطلع يقول هيك ما بتصدق انه ضد العدالة الاجتماعية

IL PADRINO
24-09-2009, 17:55
طيب عرياحتك
انت كيف بتحب نتحاسب علنسبة و لا مقطوع
و الله يالي بيرحيك نسبة ... مقطوع ... صراحة انا مقطوع
من كل شي كمان من شجرة كمان
عم تكذب انت
لا والله يا حبيبي
ابن مين انت

IL PADRINO
24-09-2009, 17:55
عدو صديقي عدوي
و صديق عدوي ... عدوي
و صديق صديقي ... صديقي
ما معقول شو مزوبطة ملاحظ
طلعي منهم هالخبريات
.... ليه
خلصنا بقى انا هلئ بعطيكي 100 متل عاواحد صديقه لصديقي و يعني شي و لا اسئل مين هيك و لا صديقي و لا مستعد من اجل صديقي يتسمى علي صديق
وثقي

IL PADRINO
24-09-2009, 17:56
بقلك يا اخي شو بدك
بعرف
العقل طينة
هيك لحنبلش
زينة عفوا
ايه
ايه اول شي بلش بالعقل طينة



تقدم
دخيله

شو بدك
العقل زينة
دخيله



حكمة الاسبوع المقبل
مش دايما المختصر بيكون مفيد
انا شخصيا بعد ما فهمت شي
و انت
غموض



متصور اذا واحد ما عنده شي الا يحكي قديش ممكن يحكي
و خاصة اذا الله طول بعمره



عملنا شهر... عسل شو شهر عسل ... تلينا الدنيا عسل عم قلك

IL PADRINO
24-09-2009, 17:56
من المرات القليلة يالي بتمنى فيها كون غلطان
بس شك انك عم تخونيني و انت عم تنكري و تقولي
تفو عليك مش مزبوط انت عم تفكر هيك
شو بحب بهي اللحظة كون غلطان
يكون الحق معك
يكون الحق معك يا اختي و انه شو فيها يعني
قرطتيني و طلع الحق معك شو هالقصة يعني
مش احسن ما يكون الحق معي يعني
شو منكون استفدنا
بتكوني داجا ارطتيني ...





- طب ما انت طلبت مني كون صريحة
-ايه اوكى ما انا طلبت منك صريحة بس بدي ارجع اطلب منك غير شي
اذا الصراحة بلاها يعني كليا
اذا جاي تخبريني انك ضهرتي مع ادي اوكى
خلينا على الكذب ارجوك
اوكى
-غريب انت ...
و انت عجيبة ....






ما دامك مش قادر تعيش معي
كيف الك عين تقلي بموت فيكي
هوووووووون




بتحبني يا عيس ؟
و لو شو عم تحكي انت
معلوووووم

IL PADRINO
24-09-2009, 17:56
حابك على علو 1500 متر عن سطح البحر
و نتقل الان الى الموجة المتوسطة
و طولها 303 امتار أي 989 كيلو بطاطا
يعني شي اعلى بكتير من كل هالقصص و الخرفشات تبع تبع يالي حواليك
اه
و الله




كل امرأة
كل امرأة ابدا و لو طولها 135 سم تصور
كل امرأة هي ام فعلية لأطول جحش في العالم
اجمعين



كله فاني
حتى انتي و قرايبك
تصوري


شفتك و انت طفران
و شفتك و انت مرتاح و معك مصاري
كتير بتشبح حالك
كتير بتشبح بعض
كانه نفس الشي
كنت لخبط فيك
كان يبقى منظرك طفران و انت حامل مصاري
و احيان بفكرك تقدر تدفع و تشتريلي و تكون طفران
يا الله ما احلاك
انا معجبة فيك
انا باموت فيك و يعلن كل شي في وراق مصاري




هايدا شو هلئ حياتي حب و لا حنان ...
لا ... التنين

IL PADRINO
24-09-2009, 17:57
شو هي هالقد معقدة حياتي يعني
ب 3 اسطر بتنقال كلها
لا يخت عندي
و لا تلفون بالسيارة
و الحمد لله رب العالمين ما بلعب بوكر
بالباصر بلخبط
و فيديو و تلفزيون ما بحضر
ما بحضر لانه بغفى
هايدا الريون اكس يالي بيطلع من الشاشة اله علي تأثير مخدر
فمافي لزوم حشش مثلا
يعني الحشيش الله مريحني منه
هايدني على الريون اكس بداله اذا اعتزت انسطل
و حياتي هي هي اذا كنت رايق شوي شي ليلة بيصير في تقنين
و اذا في كهربا بعصب لانه بشوف قديش بيتي بده ترتيب و كل شي فوق بعضه
اف شو ناقص اشيا و زايد اشيا
و اذا اجيت اتلقح شوي شي مرة بعد الغدا بيتلقح واحد صاحبي بالمشفى فبلبس و بنط لعنده
شو بعد في ..
بعد في البيانو
كل ما دق بيانو بشتاقلك
و اذا كنت ما عم دق بيانو و عم بشتقبلك بكون نايم
و هون بيكون احسن شي
ما النوم بروفا للموت
انتهينا

IL PADRINO
24-09-2009, 17:57
اذا مأفط كل النهار و فظ باطباعي ... مختصر يعني متل ما انت بتقوليله اخو شحطة بتعجبي فيني
و اذا كنت صريح و رقيق قال و بتلبك بس شوفك بتحبيني
ايه بين التنين خلينا على الاولانية
خليكي معجبة فيني احسلك و ارحلي
و افضلك و اضمنلي
اذا هايدا البهلة قادر يضحكها و يسليها هالقد يعني
يعني انا شو باعمل فيها انا بفطسها من الضحك





ساعة بتقوليلي الالوان الغامقة بتلبقلك
ساعة بتقليلي الالوان الفاتحة كتير بتلبقلك
ما معقول شو طالع عليك حلو هالون
و ساعة انو الضيق فظيع عليك
ساعة انت بيقبلك الواسع بتعرف هالشي
مزبوط
و الله انا ملاحظلك انه كل شي عم يطلع يلبقلي
و انا بيني و بين نفسي على المرايا مو شايف
علي سيستيم الله اكبر
ما تكوني يا عمي انتي مهبولة فيني و انا ما بسوى نكلة مثلا
لا ولو ما اسئلك
لا مثلا يعني
كيف نكلة ..شو بتقصد بالنكلة
اه ما بتعرفي شو النكلة .. مو شايفة النكلة يعني
لا شو النكلة
مم ما هو لو شايفتيها كتير بتشبهني عم قول انا كيف مو ملاحظة اني ما بسوى نكلة
نكلة اخت يالي خلقني

IL PADRINO
24-09-2009, 17:57
ليش اذا الواحدة اخته للواحد هي بتقوم بتعمل قهوة ؟
و اذا الواحدة مش اخته و لا نتفة للواحد هو بيقوم بيعمل القهوة ؟
معكم سنة لتجاوبوا .... اذا الكم عين تجاوبوا



- شوووو بعدك طيبة انتي ؟
- و لا اطيب من هيك



- فعلا هايدي هالبنت هايدي عم تسعى
- عم تسعى لشو بحياتك
- عم تسعى على عشرة و الله !


- خبرني شو وضعك على المزبوط انت و هالمراة
- خيي شو بيعرفني يا خيي ... شو دين ربها هالمرا ما عم اعرف ...يعني هي نفسيتها ... هي قصة ... شو بيعرفني ...نفسية جواة نفسية جواة نفسية ... ما معقول متل الخسة الله وكيلك




- اشتريتلك بمناسبة هالعيد هدية كتير كتير كتير ثمينة قد ما انت ثمينة على قلبي و اقل ... لانه يعني انت ما بتتمني ... بس عملت
المستطاع و جبت هدية حطيت فوقي و تحتي و اندينت كرمال لجيبها لانه كتير كتير ثمينة .. هدية بخمسة الاف دولار ... أي و الله
- حياتي عيسى ريتك تقبرني
- يا ريت ما لي قلب !
- شو هي
- ما باعرف
- كيف مش انت نقيتها
- مبلى بس نسيت
- كيف نسيت
- و الله نسيت هلئ بس تفتحيها يوما ما بتشوفي شو هي
- وين هيي حياتي ... فرجيي ياها
- يا ريت راحت
- كيف راحت
- بس وعيت راحت !!!




بحب عرفك على الست اليزابث .... يا اهلا يا اهلا بالست اليزابث ... الي زابث ما تعرفت على ست متلك ... الي زابث ما حصلي قابل شخصية متل افضلاك ...



لو بينمحوا من حياتي
اه ..
ياه ...



قدمنا لكم ...
ياه ...
دخيلك
هههههه انا صراحة هيك شي بشوفه بهلنة
هههههههه

IL PADRINO
24-09-2009, 17:57
ليش الواحدة ما بتدايق من واحد عم يلطشها اذا فجأة عجبها
خلصني يا شيخ ...
بتصير بتقول من جوا انشاء الله يا رب يلطش بعد ! ...
كان عم يلطش ... وقف ... ليه ؟؟؟




ايدت على ورقة كزا شغلة لما انساهم .... بس نسيت الورقة !!!.........
ياي ... ما احلاكي .... برافوووو




- ولك يا زلمة شوبيك ..
- شو ..
- انت عم تضيع حالك ...ساعة بتضهر مع روزة ساعة بتضهر مع حنان ... ليه مضيع حالك بحالك .. اعتمدلك على انسانة بحياتك انت بترتاح ... روزة لا حنان ... حنان لا روزة
- شو فيها عينو .... شو لبن و سمك هنن ؟؟؟




تغلط معي قدام الناس و بتعتذر بس نصير لوحدنا يا ريتك بتعتذرلي قدامهم لهل الناس ...
و الله ما راح يصرلك شي و شورابك ما راح يهرو ... و بعدين بيني و بينك غلاط قد ما بدك



ليكي ..
انشاء الله بينعاد عليكي ...
بمناسبة هالعيد انشاء الله ينعاد عليكي
و بيضل ينعاد عليك لتفطسي يا رب ...
و بينعاد عليكي انشاء بيضل ينعاد عليك بنفس الطريقة أي و الله



اذا مرأة قالتلك جرحتلي شعوري ما تصدق .. ما يهمك و كفي ! ...
تابع ... كفي لتشوفها عمتنزف ... ساعتها و بس ساعتها وقف
ليك روحها كتير طويلة و حياتها اطول ... عاطول ... و ما بتاذي الا لتنذف
العمى .... متطرفة كتير هايدي .... طبعا يا بيبي !!!






- ايه بس انا اكيدة انها بتحبك
- اكيدة يعني ؟ ... طيب انا شو بستنتج من حديثها اخر مرة معي ؟
- اياه ... وقت ما جيت خبرتني ...
- لا ما اخر مرة ما عاد خبرتك ... ما هي بالاساس بتضل بتخبرني ما باعرف .. حاسة في حيط بيني و بينك ... عرفتي كيف و فجاة تاني نهار قالت بتعرف ... يمكن انت الحيط !! ... عرفتي .. قلتلها كيف يعني ما الحيط بيني و بينك عم تقولي ... قالتلي لا ما هي ذاتها ... ما باعرف ... نسوان يعني ... بس رهيبين بالمنطق ... قلتلها لك يا بنت الحلال ما عم تقولي حاسة ما بيني و بينك حيط .. يعني في 3 اشياء .. انا و انت و الحيط يالي عم تحكي عنه .. مزبوط ... قالتلي انا ما عم افهم شي شو فارقة معي ..باعرف انه انا بحس شي تجاهك و انت حيط ... منيح هيك .. شو الفرق اذا نحنا و الحيط 3 و لا 2 ... خلص في حيط و انت الحيط
- ايه و شو قلتلها انت ؟
- انا ما عاد قلتلها شي !!!
- ليه ما حكيت ؟
- لانه اذا فعلا انا حيط كيف بدي جاوب .... عرفتي كيف ؟؟




بحبك ... بحبك ... بحبك و شو ما بدك راح اعطيك
انت يالي مش عم تطلب شي .. لحاعطيك كل شي ...






هههههههه
العقل زينة
ههههههه
العقل زينة
ههههههه
العقل زينة

samikhoury83
29-01-2010, 17:35
طلما إنو الكردي مش رفيق ودرجه أولى، وله ما كل الدرجات بدنا يها أولى شو هل جرصة.. لش في درجات؟؟ عندك إنت صار في درجات؟؟ ما هو، ختصر قول، مواطن، رفيق، وهيدا كردي بس ينصاب عل جبهة لازم يلحقو نفس الطدبيب لبيلحأ إصابة رفيق من بيت "اكس" يا عيب الشوم شو هل حكي وع إذاعة كمان.. يا رفيق هيدا عيب يا بني لبناني يميني أو يساري إذا اليمين إلى زوال كما نقول بيبئة من واجب اليسار إنو يفتح القاموس ويفتش ع كلمة تستكردني ويلغيا أولاً لغوا من هل قاموس العربي اللبناني لبعد لا هلق مش معروف عربي ولا لبناني إنو هو الشعب الكردي قيد الدرس؟؟ لش نحن شو؟؟ ماشي ما هو ما ماشي الدرس إلا عل اكراد رأس الحكومة لتوال علينا بعد ما أقر لل كردي الجنسية منيح فهمنا.. بس رؤسا احزاب يسار بعد ما أقر لل كردي الرفاقية.. مش منيح ما فهمنا ولا راح نفهم وله يا عمي ما عم يستشهد إنو شو بيجي بيترجكن ت يعيش مواطن .. إنو بيستشد مرتين ت يموت رفيق درجه أولى من بيت "اكس" .. قيد الدرس اه.. لش هل جمهورية المستقيمه متل العجيب بنص الخارطة قيد شو بالله؟؟ لعم يحكي ليوم هو غير لماتو لمعتر بكل الأرض دايماً هو ذاتو


زياد الرحباني- من العقل زينة

<input id="gwProxy" type="hidden"><!--Session data--><input onclick="jsCall();" id="jsProxy" type="hidden">