رفاقي

تحية حمراء وبعد


هذه أول مشاركة لي في هذا المنتدى الرائع الذي تعجز الكلمات عن وصف روعته وعظمته و عظمة الرفاق فيه من مشرفين وأعضاء

قصيدة رائعة بعنوان بلدي وحبيبتي للشاعر أحمد فؤاد نجم تتحدث عن حب الحبيبة وحب الوطن

أرجو أن تعجبكم

بلدي و حبيبتي
----------------

الغرام في الدم سارح
و الهوى طارح معزه
و الحنين للقرب بارح
و النوى جارح
يا عزه
يا ابتسامه فجر هلت
بددت ليلي الحزين
يا ندى الصبح اللي سأسأ
فوق خدود الدبلانين
بل شوقهم
صحى لون الورد فوقهم
كل خد و شم ورده
مين يدوقهم
غيرك انتي
و مين سواكي
يا حياتي يا ملاكي
يا نسيم الحب لما هب
هز القلب هزه
يا هوي الأحلام يا عزه
يا هوي الأحلام يا عزه
***
الليلادي جم خدوني يا ملاكي
جوز تنابله و نص دسته من التيران
كنت باحلم يا حبيبتي
كنت باحلم
بيكي انتي
كنا قال
انا و انتي قال
في جنينه خضرا
و محاوطها البرتقال
و السيسبان
و انتي جوه قرنفلايه
بالعبير بتستحمي
اجري يمك يا هوايا تسبقيني وتجري يمي
احضنك و اشرب عبيرك
من شفايفك
و الغصون واقفه و شايفه
بتراعينا بس خايفه م العيون
و العيون بتقول كلام
و الكلام طاير حمام
بينادينا بالأغاني
و يهادينا بالسلام
كنت باحلم يا حبيبتي
كنت باحلم بيكي انتي ... ايوه انتي
و مين سواكي ... يا حياتي يا ملاكي
يا نسيم الحب لما هب
هز القلب هزه
يا هوى الأحلام يا عزه
يا هوى الأحلام يا عزه
***
و انطلق في الفجر فجأه يا حبيبتي صوت مفاجأة
صوت يخلي الدم يجمد
اصحى يا احمد
اصحى يا احمد
و انتهى الحلم الجميل
و ابتدا الهم التقيل
- فين امام؟ ( الشيخ إمام عيسى )
- انتوا مين ؟
- احنا ناس مكلفين
تيجي سالك مش هاتتعب
و احنا طبعا معذورين
- انتوا دود الأرض و الأفه المخيفه
انتوا ذره رمل في عنين الخليفه
انتوا كرباج المظالم ... و المآسي
انتوا عله في جسم بلدي ... انتوا جيفه
- سكتوه ابن الكلاب ... سففوه من التراب
فتشوا كل الأماكن ... طلعوا رفوف الدولاب
***
كمموني يا حبيبتي ... كتفوني يا حبيبتي
قوموني...قعدوني
كل شعره في جسمي بالعين فتشوها
المخده من جنانهم شرحوها
و انتهى التفتيش مافيش ... صدقيني ما تخافيش
هو فيه يا عزه عندي ممنوعات
غير باحب الناس ... و باكره السكات
***
بص واحد من التنابله جوا عيني
و انتي عارفه
عنيه صافيه وطيبين زي كل عيون بلدنا يا حبيبتي
شباكين ع القلب دوغري موصلين
***
كان مناه يلمح علامة خوف بسيطه
طب حاييجي الخوف منين ابن العبيطه
هو مين فينا الجبان ولا مين فينا اللي خان
اللي قــلبه بالمحبه و بالأماني بالربيع لاخضر مزهر والأغاني
ولا كلب الصيد و اسياده الأباطره
اكالين لحم البشر فوق الصواني؟
هو مين فينا الجبان ولا مين فينا اللي خان
هو بص في عيني بصه ارتجف و في حلقه غصه
و اتعوج و مال وقال
جملتين مش مفهومين
اصله شاف صورتين جُمال في العيون الطيبين
مصر في العين الشمال و انتي في العين اليمين
أيوا أنت ومين سواكي
يا حياتي يا ملاكي
يا نسيم الحب لما هب هز القلب هزة
يا هوى الأحلام يا عزة
يا هوى الأحلام يا عزه


أرجو أن تكون أعجبتكم القصيدة وأرجو من جميع الرفاق الذين يعرفون مثل هذا النوع من القصائد الذي يتحدث عن حب الحبيبة وحب الوطن
أرجو أن يضيفها


أكبر تحية من القلب لكم يا رفاق الدرب




يساري للدم